Очигледно 2020 година се покажа одлична година за Адел. Покрај промената на физичкиот изглед и животниот стил, за кој многумина „не престанаа“ да зборуваат, утре 24 октомври ќе биде домаќин на шоуто „Saturday Night Live“, а се шпекулира дека Адел ќе објави и нов студиски албум.

Од шоуто неодамна најавија дека покрај Адел, ќе гостува и пејачката „H.E.R“. Адел претходно во два наврати гостуваше на „SNL“, во 2008 и 2015 година.

„По ѓаволите, толку сум возбудена за ова. Во исто време, апсолутно преплашена! Ќе бидам домаќин, ќе имам свирка на „SNL“  и сите тие работи“, напиша Адел.

„Отсекогаш сум сакала да го доживеам овој самостоен момент, да можам да ги засукам ракавите и целосно да се фрлам на работа, но никогаш не беше соодветен тајминг. Но, 2020 година е одлично време, нели?“, додаде Адел.

Се шпекулира дека четвртиот студиски албум на пејачката ќе биде објавен во декември. Поминаа дури пет години од последниот албум на Адел насловен „25“, кој на обожавателите им даде доволно време да ја наместат сложувалката, преслушувајќи ги старите песни одново и одново.

Еден нејзин обожавател напиша – „Сите ја коментирате тежината на Адел, но се запрашал ли некој каков ли ќе биде нејзиниот нов албум“, алудирајќи на фактот дека можеби Адел покрај физичките промени, ќе направи и музички.