Заев: Унапредувањето на регионалната инфраструктура значи можност за поврзување на нашата држава со регионот
Силна поддршка од страна на Европската инвестициона банка во европската агенда на стратешките регионални и домашни проекти ни пренесе заменик-претседателката Лилјана Павлова на денешниот состанок, напиша премиерот Зоран Заев.
-Унапредувањето на регионалната инфраструктура значи можност за подобро инфраструктурно поврзување на нашата држава со регионот, но и меѓу државите во регионот, што значително влијае и на унапредувањето на политичката соработка. Подеднакво важна е и поддршката што ја добиваме во делот на унапредувањето на квалитетот на живот на граѓаните дома. Како значајни проекти ги издвоивме патното регионално поврзување во рамките на проектот Коридор 8 и проектот Интерконективен гасовод Северна Македонија – Грција- напиша Заев на својот фејсбук профил.
На домашен план, вели Заев, тоа се вложувањата во здравствениот сектор, во зелената агенда и енергетската ефикасност, водоснабдувањето, дигитализација на училиштата, зајакнување на институционалните капацитети.