Запрашан за планот за раст на платите, претседателот на СДСМ и поранешен премиер, Димитар Ковачевски, во интервју за Слободен печат порача дека до 2028 година, минималната плата ќе биде во износ од 600 евра, дека тоа нема да биде оптоварување за бизнис секторот и дека неговата партија има план како тоа да го направи.

Бизнисот може да издржи минимална плата од 600 евра, ќе ви дадам пример, денес во приватниот сектор минималната плата е над од она што е законски определно и најголем дел од приватните компании своите плати ги имаат димензионирано над нивото на минималната плата и вие ако ги погледнете огласите за вработувања, ќе видите дека платите веќе се на повисоко ниво од оние 22.500 денари колку што е минималната плата“ рече Ковачевски.

Тој потсети и дека претходно имало неверување околу растот на минималната плата, но и напади дека тоа би можело да ја загрози економијата.

„Во времето кога јас со мојот тим работев на воведување на методологијата за раст на минималната плата, економистите на ВМРО-ДПМНЕ беа против, тие велеа дека ќе пропаднела економијата, дека тоа негативно ќе влијаело на бројот на работни места, дека ќе влијае негативно на просечната плата и така натаму. Се покажа дека не биле во право, се покажа дека јас и мојот тим сме во право, бидејќи во исто време имавме и зголемување на минималната плата и зголемување на просечната плата и намалување на невработеноста од 25% на 12.8%. На тоа секако влијаеше и поддршката кон домашните и странските компании на отворање на нови инвестиции, но сигурно и влијае што сме членка на НАТО. Ние денеска сме гледани како сигурна дестинација за инвестиции. Сигурно дека влијае и започнувањето на преговорите со ЕУ, бидејќи инвеститорите сакаат да работат во земја во која напредува, земја која оди напред, земја во која има демократија и каде можат нормално да работат. И затоа верувам дека 600 евра минимална плата е остварливо и имаме план како тоа да го направиме“ посочи Ковачевски.

Повеќе од интервјуто со лидерот на СДСМ Димитар Ковачевски во видеото во продолжение.