Екипите на Рома и Јувентус го одиграа најдобриот и најспектакуларниот натпревар во 2022 година, беа постигнати седум гола, имаше пресврти и на крајот се радуваше „старата дама“.

Јувентус славеше со 3:4 на гостувањето кај Рома иако губеше со 3:1,а во финишот со играч помалку ја одбрани победата.

Првото полувреме заврши 1:1 и тоа благодарение на головите на Тами Абрахам за Рома и Пауло Дибала за Јувентус. Но, веќе на стартот од вториот дел, Мхитарјан во 48 минута и Лоренцо Пелегрини во 53 минута и носат водство на „римската волчица“ од 3:1.

„Старата дама“ не се предаде и за седум минути направи спектакуларен пресврт. Прво Мануел Локатели во 70 минута намали на 3:2, а четири минути подоцна Дејан Кулушевски донесе израмнување. Матиа де Шиљо со првиот гол во Серија А од 2017 година, во 77 минута му донесе предност на Јувентус.

Во финишот, исклучување заработи Матијс де Лихт, но и покрај тоа, неговите соиграчи ја задржаа предноста и дојдоа до победата.

Јувентус сега има 38 бода за петта позиција на табелата, додека Рома остана на осмото место со 32 бода.