Стотици згради се поплавени од вчера попладне откако се излеаја неколку реки во североисточна Босна, а на жителите нови проблеми им предизвикуваат врнежите што се очекуваат денеска.

Најлоша е состојбата во општина Челиќ, каде се поплавени околу 200 семејни куќи и други објекти.

Обилните врнежи доведоа до излевање на реката Шибошница и други водотеци кои го претворија центарот на градот во езеро. Локалните медиуми јавуваат дека се урнале неколку земјоделски објекти, а поплавите однеле и неколку автомобили.

Властите прогласија состојба на природна катастрофа. Обилните врнежи од дожд и порои предизвикаа големи штети и во општина Сребреник, каде што се поплавени голем број објекти.

Поплавени се и големи земјоделски површини во Зворник во источна БиХ, соопштија локалните власти.