Американскиот Стејт департмент ја разгледа можната забрана на САД за „TikTok“
Американскиот Стејт департмент ја разгледа потенцијалната американска забрана за апликацијата „TikTok“ додека компанијата се подготвува за правна борба против новопотпишаниот закон што ќе ја принуди платформата за социјалните медиуми да ги прекине врските со нејзината матична компанија со седиште во Кина.
Потенцијалната правна битка речиси сигурно е поддржана од кинеските власти бидејќи жестокото ривалство меѓу САД и Кина ја загрозува иднината на многу популарниот начин за поврзување на младите во Америка преку Интернет.
Пекинг сигнализираше дека „TikTok“ треба да се бори против, како што го нарече, „разбојничкиот“ чин на американските законодавци „за да ги грабне од другите сите добри работи што ги имаат“.
Доколку не успее правниот предизвик, набљудувачите велат дека кинеските власти веројатно нема да дозволат продажба, потег што може да се смета како предавање на Вашингтон.
Во четвртокот во Стејт департментот, главниот заменик портпарол Ведант Пател го истакна образложението на администрацијата на Бајден зад потенцијалната забрана на САД.
„Ова не е за американскиот народ кој користи „TikTok“, рече Пател и додаде дека станува збор за сопственоста на апликацијата поврзана со Народна Република Кина.
Пател рече дека прашањето се однесува на приватноста на личните податоци на американските корисници.
„Мораме да осигураме дека податоците, приватноста на американскиот народ, не се во сопственост на противнички актер кој потенцијално би можел да ги искористи против нас,истакна тој“.
Законодавството што американскиот претседател Џо Бајден го потпиша оваа недела може да му овозможи на Вашингтон да го прошири својот опсег за да цели кон други апликации поврзани со Кина, како што е популарната платформа за е-трговија „Тему“, и да ги охрабри сојузниците на САД да го следат примерот, велат аналитичарите.
Со 170 милиони американски корисници, „TikTok“ вети дека ќе го оспори новиот американски закон, кој бара од нејзината компанија со седиште во Пекинг, „ByteDance“, да ги продаде своите акции во рок од една година за да се избегне забрана.