Воен емигрант од Украина освоил 500.000 евра благодарение на ливчето „греб-греб“, соопшти денеска белгиската национална лотарија.

Добитникот е на возраст меѓу 18 и 24 години и живее во Брисел изминатата година, објави Ројтерс.

Тој минатиот месец на бензинска пумпа купил лото ливче од пет евра, кое по успешното гребење го помножил со 100.000 пати.

Идентитетот на добитникот ќе остане непознат, како што е правилото за сите добитници на лотарија во Белгија.

Портпаролката на Националната лотарија Џоке Вермер рече дека добитникот имал измешани чувства.

„Тешко е да се биде задоволен со оглед на се што се случува во неговата татковина“, истакнала таа и додала дека младиот човек прво сака да направи прослава за да им се заблагодари на сите што му помогнале да се интегрира во Белгија, а потоа сака да направи нешто за неговите сонародници и за обновата на Украина.

Таа спомна дека мажот, иако е среќен во Белгија, каде што се вработил, би сакал да се врати во Украина штом ќе заврши војната.

Добивките на лотарија во Белгија се ослободени од данок, а куриозитет е што минатата година 165 луѓе од едно мало белгиско село освоија 142.897.164 евра на лотарија.