Томас: Финансиските проблеми го прават Вардар уште посилен!
Во текот на сезоната Вардар се соочи со многу пречки од аспект на честите повреди кај играчите, неисплатените плати…
Но и покрај тоа момците на Парондо собраа сили со голем труд, желба и квалитет да го обезбедат третото учество по ред на Фајнал фор турнирот во ЛШ.
Непосредно пред настапот на ракометниот спектакл во Германија, „црвено-црните“ се парично казнети од Дисциплинската комисија на ЕХФ со 8.000 илјади евра.
Причината поради казната е однесувањето на тимот во последните минути од четвртфиналниот реванш меч во Унгарија против Пик Сегед. ЕХФ пишува дека казната е поголема, бидејќи ова е втор инцидент во кој учествувал Вардар оваа сезона, после оној во Полска против Келце како отежнувачка околност. Пик Сегед доби парична казна од 16.000 евра.
И од редовите на Барса се свесни дека нашиот првак се соочува со економски проблеми. За шпанските медиуми зборуваше еден од најискусните ракометари во каталонскиот гигант, десното крило Виктор Томас:
– И покрај ситуацијата во која се наоѓаат и големиот број економски проблеми, Вардар е тим кој е уште поопасен, бидејќи за него ова е прашање на гордост. Овој меч против нив е како финале, сè е можно во текот на таа средба. Најважно е да се фокусираме на нашата игра, да се претставиме што е можно подобро и да дојдеме до триумфот – беа зборовите на Томас.