Тешка животна приказна на Лучиќ-Барони: Татко и ја тепаше, а Иванишевиќ и го спаси животот
Хрватската тенисерка Мирјана Лучиќ-Барони ја отвори душата зборувајќи за најтешкиот период од својот живот притоа откривајќи дека животот и го спаси актуелниот тренер на Новак Ѓоковиќ.
Станува збор за 1998 година и настапот на Вимблдон каде дека Лучиќ-Барони била малтретирана од сопствениот татко. Таа уште во тоа време објави дека татко и ѝ се заканувал оти ќе ја убие нејзината мајка, а спасот го најде во Горан Иванишевиќ кој успеал тенисерката и нејзината мајка да ги засолни во Лондон.
– Горан ми го спаси животот. Изгледаше како во филмовите за Џемс Бонд, освен што тука стануваше збор за нашите животи – изјави Лучиќ-Барони.
Тенисерката потоа заедно со мајка и се вратиле во Загреб каде 18 дена чекале виза по што со шестчлено обезбедување заминале во Њујорк, САД. Таа исто така раскажува како татко и ја тепал уште додека била мала.
– Малтретирањето започна кога имав само пет години. Загубив од постара тенисерка на тренинг, а кога си дојдов дома тоја ме удри толку силно по носот што ми потече крв – раскажува Лучиќ-Барони.
Сега мрачниот период од животот е минато за Мирјана Лучиќ-Барони, таа стана мајка, животот и се врати во нормала и дури планира кам-бек во тенисот иако има 38 години.
Нејзиниот најдобар пласман во кариерата е 20. место на ВТА ранг листата, а има освоено и три титули.