СОНК бара наставата во првите две недели да биде онлајн
Самостојниот синдикат за образование и наука (СОНК) побара од Министерството за образование и наука и Владата да размислат за алтернативни методи на наставата во второто полугодие во основното и средното образование, додека бројот на заразени не падне и не се стабилизира епидемиолошката сосотојба во земјата.
Претседателот на СОНК, Јаким Неделков вели дека во време на висок процент на заразени и ниски температури, не се сигурни дека Владата донела исправна одлука за начинот на одржување на наставата во второто полугодие.
– Ако се погледнат бројките на дневно ниво на заразени од ковид-19 и ако стручните лица кажуваат дека пикот се уште не е постигнат, оправдано стравуваме дека пикот може навистина да се случи во училиштата и многу ученици и наставници да се заразат. Таквата состојбата ќе биде сериозна, вели Неделков.
Тој вели дека сите се свесни за опасноста од омикрон-сојот кој се шири побрзо и полесно, но со оглед на минусните температури и на почитување на протоколите на проветрување на училниците, покрај ковид-19, може да има и ширење на грип, настинки и друго.
– Затоа бараме алтернативно изведување на наставата, па потоа да се види каква ќе биде епидемиолошката сосотојба. Првично предлагаме наставата две недели да се одвива онлајн. Наставниците се веќе обучени, на учениците им е познат начинот на функционирање. Знаеме дека тој начин е потежок, но засега е побезбеден – додава претседателот на СОНК.
Наставата во основното и средното ќе започне на 1 февруари со физичко присуство, велат од владата