Осум дена пред парламентарните избори во Хрватска, ХРТ објави анкета за рејтингот на политичките партии, направена од агенцијата Рејтинг.

Според анкетата, на вчерашните избори требаше да победи коалицијата Рестарт предводена од опозициската СДП. ХДЗ требаше да освои 6 мандати помалку од СДП, а на пример коалицијата ,,Можеме“ предводена од Томислав Томашевиќ два мандата. Три дена пред изборите, самата коалиција ,,Можеме“ објави дека имаат три сигурни мандати.

Но, вчерашниот ден во Хрватска донесе бројни изненадувања.

Најголемо од нив беше коалицијата ,,Можеме“ формирана од поранешниот висок партиски функционер на СДП, Томислав Томашевиќ, која освои 7 сигурни места во хрватскиот парламент.

Оваа коалиција е формирана на база на различности и граѓански активизам, а имаше сосема неформална, необична и модерна граѓанска кампања. Се одликуваа со едноставност, шарм, скромност, без големи ветувања. Хрватска ја поминаа главно на велосипеди и со волонтери кои ги пренесуваа пораките на ,,Можеме“.