Рускиот министер за одбрана Сергеј Шојгу изјави дека испораката на оружје од Западот во Украина го вовлекува НАТО во конфликтот и може да доведе до „непредвидливо ниво на ескалација“.

Руската новинска агенција ТАСС објави дека Шојгу, за време на конференциски повик, ги обвини САД и нивните сојузници дека се обидуваат да го продолжат конфликтот што е можно повеќе.

Тој изјави дека тоа го прават со снабдување на Киев со „тешко офанзивно оружје“.

„Таквите потези всушност ги вовлекуваат земјите од НАТО во конфликт и на крајот може да доведат до непредвидлива ескалација“, рече Шојгу.

Рускиот министер за одбрана додаде и дека руските сили постигнале напредок во битката за контрола над источниот украински град Бахмут. „Офанзивата напредува успешно“, рече Шојгу.