Ристовска и ЦСКА Москва без финале во Лигата на шампионите
Денеска на Фајнал-фор турнирот во Будимпешта се одиграа полуфиналните натпревари во женската ракометна Лига на шампионите, триумфи забележаа екипите на Брест и Кристиансанд.
Францускиот претставник Брест направи изненадување совладувајќи го еден од фаворитите за титулата оваа сезона, унгарскиот Ѓер, со 27:25 по изведувањето на пеналите.
По регуларниот дел мечот заврши 20:20, по продолженија од по пет минути 23:23, а во пенал серијата Ѓер двапати не реализираше и на тој начин Брест за првпат во својата историја ќе игра за трофејот во елитното европско клупско натпреварување. Интересен е податокот кој вели дека Брест е првиот клуб во историјата на францускиот женски ракомет кој ќе игра во финалето на ЛШ.
А таму ќе се соочи со норвешката екипа на Кристиансанд која пак во втората полуфинална пресметка ја елиминираше ЦСКА Москва со 33:30. За рускиот тим настапи македонската ракометарка Сара Ристовска која еднаш се запиша во листата на стрелците.
ЦСКА в недела од 15:15 часот ќе игра за бронзата на Ф4 турнирот против Ѓер, а од 18.00 часот е завршната битка за титулата помеѓу Брест и Кристиансанд.
Норвешка чека трофеј во ЛШ од 2011 година кога на европскиот трон беше Ларвик, а Русија од 2008 година кога најдобар беше составот на Звезда Звенигород.