По најавата на Велика Британија за снабдување на Украина со муниција со осиромашен ураниум Москва и Минск се договорија да разместат тактичко нуклеарно оружје на територијата на Белорусија, изјави рускиот претседател Владимир Путин во интервју за ТВ каналот Росија 24. Тој вели дека изградбата на складиштето ќе биде завршена на 1 јули.

„Муницијата со осиромашен ураниум што Западот ќе ја пренесе во Киев не припаѓа на оружје за масовно уништување, но на некој начин создава радиоактивна прашина и затоа се смета за многу опасна. Неизбежно ќе има контаминација на засеаните површини, што ќе создаде опасност и за локалното население и за животната средина“, рече Путин.

Белорускиот претседател Александар Лукашенко во неколку наврати го покренуваше прашањето за заканите што ѝ се поставени на неговата нација од нуклеарното оружје распоредено од САД во земјите на ЕУ.

Минск треба да преземе „соодветни мерки“ за да се справи со оваа закана, рече тогаш Лукашенко, додавајќи дека ќе разговара со Москва за ова прашање.