Продолжува собраниската дебата за буџетот
Буџетот трет ден ќе биде тема на дебата на пратениците во Собранието. Пленарната седница е закажана во 11.00 часот, а дополнителниот предлог за изменување и дополнување на буџетот е во второ читање.
Капиталните инвестиции, странските инвеститори, проектот за враќање на данокот, но и кој вложувал во културата, беа меѓу темите на народните избраници на вчерашниот ден од дебатата, која помина со низа реплики и контрареплики. Пратениците на владејачкото мнозинство и на опозицијата се препукуваа и за проектот „Скопје 2014“.
Пратениците од СДСМ оценија дека ребалансот на Буџетот е развоен и оти повеќе пари ќе се слеат кон граѓаните и кон бизнисот со што ќе се поттикне и раст на економијата. Според нив, сите показатели на меѓународните институции покажуваат дека државата добро напредува. За проектот „МојДДВ“ посочија дека и во времето на ВМРО-ДПМНЕ биле организирани наградни игри за да се подобри фискалната дисциплина и да се намали сивата економија.
За ВМРО-ДПМНЕ, пак, ребалансот на Буџетот нема развојна компонента, а не се реализирани и капиталните инвестиции. Критики упатија дека се зголемува јавниот долг и оти се кратат средства во образованието, културата, инфраструктурата и животната средина.
Расправата може да трае до пет дена.