По јавниот повик ѓто денеска го објави Град Скопје, со кој се бараат приватни превозници на 16 линии поделени во три пакет-линии, превозниците најавуваат дека утре ќе ја подигнат тендерската документација за да ја комплетираат потребната документација и во предвидениот рок да аплицираат на повикот.

Претставникот на приватните превозници, Јовица Зафировски денеска рече дека се надева дека на почетокот на април ќе се вратат на работа и повторно ќе бидат дел од јавниот градски превоз. Во однос на условите и возниот парк со кој располагаат, тој истакна дека ќе остане истиот возен парк, но дека имаат договор со градоначалничката Данела Арсовска да работат на подобрување на возниот парк и дека во иднина сите постари автобуси ќе бидат заменети со нови.

Со оглед на фактот дека „Слобода превоз“ и „Макекспрес“ не можат да бидат вклучени во новиот повик, Зафировски информираше дека имаат формирано нови фирми за учество на новиот јавен повик.

 Ќе има три нови фирми, секоја фирма ќе го раководи својот пакет, а пакетите се поделени по пет линии, само еден пакет ќе има шест линии, рече Зафировски.

На  прашања за бројот на возачите кои ќе бидат вклучени и дали се вклучени сите кои работеле од порано, Зафировски рече дека нема да остане ниту еден возач на улица и оти за секој пакет е утврдено точно колку возачи ќе требаат.