Европската филмска академија (ЕФА) вчера ја објави одлуката да го вклучи „Врба“ на Милчо Манчевски во селекцијата за најдобар филм на 33. Европски филмски награди.

За филмовите во селекцијата за најпрестижната европска награда, што е позната и како европски Оскар, ќе гласаат повеќе од 3.800 членови на Академијата и ќе изберат по пет номинации во пет категории: најдобар филм, режисер, актер, актерка и сценарио.

Номинациите ќе бидат објавени на 7 ноември на фестивалот во Севилја, Шпанија.

Годинава доделувањето на наградите на Европската филмска академија ќе се одржи во Рејкјавик, Исланд, на 12 декември. Во селекцијата на ЕФА, годинава се 38 филма.

Ова е вторпат филм од Манчевски да влезе во селекцијата за европските филмски награди, во 2011 година беше селектиран и неговиот „Мајки“.

„Врба“ е добитник на наградите „Хосе Оливеира“ на Фантаспорто во Порто, за најдобар филм на Велингтон, Нов Зеланд, се прикажа и на фестивалите во Талин, Тајпеј, Пекинг, Истанбул, Сараево, ФЕСТ во Белград, Синеквест во Сан Хосе, Клуж-Напока, Бенгалуру во Индија… „Врба“ неделава ќе го отвори фестивалот во Софија, а ќе го затвори фестивалот во Тирана. Номиниран е и за најдобар меѓународен филм и за најдобар режисер на Рејнденс во Лондон.