По четиричасовна борба: Пожарот кај Гевгелија е ставен под контрола

Фото: Општина Гевгелија

По четиричасовната борба со пламените јазици кои го зафатија шумскиот појас крај македонско-грчката граница, пожарот е ставен под контрола, известуваат од Општина Гевгелија.

– Поради отежнатите временски услови, односно тивкиот ветар, пожарот е сѐ уште активен, но е локализиран. Од ТППЕ- Гевгелија информираат дека пожарот зафати огромна површина борова шума, а поради ветрот истиот се прошири до грчката територија, зафаќајки ја и граничната караулата на АРМ, каде опожарено е едно полициско возило. Во локализирањето на пожарот покрај ТППЕ-Гевгелија, учествуваше и ЈПДК „Комуналец“- Гевгелија со механизација, како и граничната полиција и вработени од хотел „Фламинго“. Додека, на грчката страна во локализирањето беа вклучени и пожарникарите од Поликастро, велат оттаму.

Поради активноста и дејството на пожарникарите од електрична енергија беше исклучен објектот на ГП „Богородица“ и преминот времено е затворен за сообраќај заради безбедност на патниците и за да се овозможи простор за дејство на пожарникарите, откако пожарот се доближи до објектот на граничната караула на АРМ, до казиното „Фламинго“ и до бензинската пумпа „Шимо“”, што беше и најопасниот и најкритичниот момент од денешниот пожар во пограничниот појас на Гевгелиско.

Сообраќајот на ГП „Богородица“ сѐ уште е во прекин и ќе биде нормализиран откако екипите на ЕВН ќе проверат дали е безбедно објектот да се приклучи на електрична енергија.

Претходно, АМСМ информира дека поради затворањето на ГП „Богородица”, возилата се пренасочуваат на граничниот премин „Дојран”.

ВИДЕО | Гори борова шума на потегот меѓу Милци и ГП Богородица

Видео на денот