„Металците“ беа подобри од битолчани и во СЦ „Јане Сандански“ со резултат 89:78 и со конечни 2:0 успешно ја завршија полуфиналната плеј-оф серија.

Досега МЗТ Скопје Аеродром играше 14 пати во големото финале. Беа половични во походите на шампионската титула. Но, кошаркарите на МЗТ се изборија за уште една можност, да играат и по 15 пат во завршната битка и да се борат за својот осми шампионски пехар и двојна круна сезонава сезона.

Одлична прва четвртина одигра домашната екипа, уште во раната фаза од натпреварот изгради разлика од десет поени (25:15), но играта „два плус еден“ му донесе на Пелистер нешто поприфатливи (18:25), како што беше на крајот на првиот период од второто полуфинале, во кој Бојиќ даде седум поени, иако почна од клупата за резервни играчи. По две минути од втората четвртина, и поентирањето на Крстевски, екипата на Радуловиќ одново беше на двоцифрена разлика од (31:21), за гостински тајм-аут.

„Пелистерци“ не се предаваа, имаа 39:41 на нецели две минути пред одморот, но домашните некако успеаја да го одбијат и тој напад, и на полувреме сепак да имаат „вишок“ од пет поени (48:43).

Во третиот дел гостите дојдоа двапати на „минус два“, (50:52, 56:58), но добра вест за МЗТ беше што почна да погодува Олуџоби, кој беше „фактор икс“ на средбата во Битола. Токму силниот Американец одново му донесе на својот тим „плус 10“ (72:62) на почетокот на последната четвртина. А по „техничката“ на Пелистер, беше уште повисоки (80:69). Но, и само пет минути до крајот на средбата. Период од играта во кој гостите од Битола не успеаја да се врата, и да ја продолжат неизвесноста.

Прва лига, плеј-оф: Еуро Никел 2005 ќе се бори за шампионскиот пехар!

Во денешната пресметка во победничките редови 20 поени беа дело на Олуџоби, 13 поени додаде Стојановски, а 12 Магдевски (шест асистенции). За Пелистер убедливо најефикасен и воопшто на мечот беше Стајиќ со 30 поени (шест асистенции), следен од Кесар со 14 поени (девет скокови) и Малешевиќ (12 поени).

Противник на аеродромскиот клуб во финалната серија ќе биде Еуро Никел 2005 кој претходно со 2:0 го елиминираше Работнички.