Истакнати застапници на конзервативната партија на германската канцеларка Ангела Меркел ја критикувале одлуката на американскиот претседател Доналд Трамп да и заповеда на војската да повлече 9.500 американски војници од Германија. Со тоа во Германија ќе останат 25.000 војници од сегашните 34.500.

„Плановите повторно покажуваат дека администрацијата на Трамп ги занемарува основните задачи на водство: вклученост на сојузниците во процесите на носење на одлуки“, рекол Јохан Вадефул, портпарол за надворешна политика на клубот на застапници на ЦДУ/ЦСУ.

Сите партнери на НАТО имаат корист од кохезија на Сојузот, а само Русија и Кина имаат корист од несложност, рекол тој, додавајќи: „На тоа Вашингтон треба да обрати поголемо внимание.“

„Политички мотивирана одлука“

Андреас Ник, кој исто како Вадефул е член на парламентарниот одбор за надворешна политика, рекол за Дојче Веле дека постојат знаци дека „одлуката не е техничка, туку чисто политички мотивирана“.

Еден американски функционер, кој не сакал да биде именуван, рекол во петокот дека одлуката е резултат на повеќе месеци работа на врховниот воен заповедник, генерал Марк Мајли и дека не е поврзана со тензиите меѓу Трамп и Меркел, која го спречила планот на Трамп овој месец да организира состанок на советот на Г7.

Трамп врши притисок на Германија да ја зголеми потрошувачката за одбрана и го обвинува Берлин дека е „заложник“ на Русија заради зависноста од руските енергенти.