Откако Јовица Кукуновски -Кукун, полицаец и сопственик на пицерија, го објави видеото и фотографиите од девојчето со попреченост Маја како прегледнето јаде пица, а со семејството живее во селото Мирковци во исклучително тешки економски услови, трогателното видео за брзо време достигна огромна гледаност на социјалната мрежа Фејсбук. Покрај бројните коментари, имаше и критика дека Кукун си прави реклама за пицеријата. Но, вистинскиот резултат беше што тој успеа да им го промени животот на Маја и на семејството, кои сега се згрижени во соодветна институција од страна на надлежните служби. Видеото може да го погледнете – ТУКА. 

Дополнително, видеото и постираните фотографии предизвикале и донации од луѓе со цел да се помогне на сиромашните во овој тежок период на коронавирусот.

-За Маја дознав случајно, кога газдата на автоелектричарскиот сервис „Саре“ дојде во мојата пицерија „Рибилимус“ и ми остави четири илјади денари, пари за да носиме оброци за секое сиромашно и загрозено семејство, за лица со хендикеп, за стари лица. Едноствано, да им се помогне во овие тешки моменти додека трае коронавирусот. И така, заедно со Јовица Терзиски, следниот ден со повеќе пици се упативме во селата низ Скопска Црна Гора. Какошто одевме од куќа до куќа, стасавме и кај Маја. Ѝ ја дадов пицата, а таа бргу ја отвори и уште побргу почна да ја јаде! Од глетката се запрепастив, збунето го извадив мобилниот и кратко ја снимив. Знам дека видеото е потресно, но ова видео „Вистината за Маја“ ја спаси Маја од социјалните грижи и сега е сместена на соодветно место со топол оброк и кревет. Видеото предизвика бурни реакции, но едно ќе кажам, вистината боли!, ни рече Јовица Кукуновски.

Инаку, Јовица е познат по бројни хумани акции.

-Откако го изградив, заедно со жителите на село Глуво, манастирот „Св. Атанасиј Велики“ кај мене има преголема енергија и преку ден ја трошам на хуманитарни цели, а навечер го спроведувам полицискиот час со моите колеги. Сè е под контрола, а до граѓаните апелирам „седете дома!“, вели Јовица.

Минатата година во селото Глуво кадешто е жител, Јовица Кукуновски иницираше да се постават големи букви во холивудски стил, Глуволенд. Повеќе за убавините на ова село може да прочитате – ТУКА, а во некои подобри времиња и да го посетите Глуво.