Општина Битола ќе им додели по 10.000 денари на семејствата на осудените за „27 април“, неправедно биле во затвор
Семејствата на осудените за упадот во Собранието на 27 април 2017 година ќе добијат еднократна финансиска помош од 10.000 денари од Општина Битола.
Ова денеска го изгласаа советниците во општинскиот Совет, по иницијативата поднесена од ВМРО-ДПМНЕ.
Во документот што го усвои Советот, финансиската помош им се доделува на семејствата, поради тоа што нивните блиски биле неправедно осудени. Оваа квалификација наиде на реакции во Советот. Според советници од ДОМ, ваква формулација може да даде суд, а не општинските советници.
Одлуката беше изгласана без присуство на советниците од СДСМ и од Поинаку, кои уште во петокот ја напуштија седницата. Од СДСМ потоа преку партиско соопштение порачаа дека одлуката на Советот за финансиската помош за осудените за „27 април“ е злоупотреба на парите на граѓаните на Битола.
Советниците од Левица ја поддржаа иницијативата, иако ја нарекоа „лицемерна, срамна и омаловажувачка“.