Комитетот за елиминација на дискриминација врз жените при Обединетите Нации утврдил дискриминација кај две жени од Шуто Оризари на кои во 2015 година им било оневозможено да добијат гинеколошки услуги. Се работи за случај кога две жени Ромки биле одбиени да бидат примени кај гинеколог, со образложение, ќе цитирам:

„Гинекологот нема да прима жени што се по контејнери“. Кога дознавме за ова, со техничка помош од ХЕРА и Хелсиншкиот комитет, спроведовме тест ситуација, односно во истата гинеколошка ординација беа испратени жени Македонки и жени Ромки. Македонките беа примени да ја одберат гинеколошката ординација за матична, додека жените Ромки беа одбиени, што е уште потрагично со образложение дека работат само со жени кои пришаѓаат на повозрасната категорија, иако и едните и другите беа на иста возраст. Случајот беше презентиран пред суд, но нашето судство ова не го препозна како дискриминација врз основа на пристап кон репродуктивни права“, вели за Утрински брифинг, Салија Халим Бекир од Иницијативата на жени од Шуто Оризари.

Комитетот за елиминација на дискриминација врз жените при Обединетите нации, препорачува државата да ги обесштети жените, што побрзо да започне со работа новата гинеколошка ординација во општината Шуто Оризари, а која и натаму не е во функција, Министерството за здравство во иднина да им обезбеди бесплатни здравствени услуги за репродуктивното здравје на Ромките кои се жртви на дискриминација и нехуман третман и да организира обуки за здравствените работници, особено за гинеколозите, во врска со дискриминацијата врз Ромите и нивните специфични потреби. Халим Бекир додаде дека Иницијативата на жени од Шуто Оризари во моментов спроведува истражување за програмите наменети за бремените жени и жените во репродуктивен период.

„За жал дојдовме до поразителни резултати за оваа година, според кои минатата година 43 отсто од жените искористиле бесплатни услуги кај својот матичен гинеколог, тој процент во 2020 година е само 14 отсто“, додава Халим Бекир.