Олимпико ќе „гори“: Веќе продадени 30.000 билети за мечот Италија – Македонија
Билетите за мечот помеѓу „аѕурите“ и „рисовите“ што се игра во Рим на 17 ноември во рамките на Квалификациите за ЕП 2024 одат како алва
Фудбалската репрезентација на Италија на стадионот Олимпико во Рим, ќе игра со Македонија на 17 ноември, во натпревар кој може да ја реши судбината на „аѕурите“ во поглед на пласманот на Европското првенство во 2024 година.
Репрезентацијата на Лучијано Спалети ќе се соочи со Македонија на стадионот чии трибини ќе бидат добро пополнети. Полниот капацитет е 72.000 гледачи.
Италијанската фудбалска федерација објави дека веќе се продадени 30 илјади билети за претпоследниот натпревар во квалификацискиот циклус, а земајќи ги предвид ниските цени на билетите, ќе се продадат уште многу.
„Аѕурите“ ќе одат на три бода за потоа со поволен резултат да играат во Леверкузен против Украина на 20 ноември и конечно да се изборат за учество на ЕП 2024.
Италија на овој меч ќе се врати на Олимпико, каде има играно најмногу мечеви (38 победи, 18 нерешени, 7 порази), две години по мечот со Швајцарија (1-1) од Квалификациите за СП 2022.