Официјално: Никола Митревски ќе биде новиот голман на Еурофарм Пелистер
Актуелниот македонски шампион Еурофарм Пелистер денеска го претставува првото засилување за следната натпреварувачка сезона 2024/25.
Капитенот на нашата сениорска ракометна репрезентација, Никола Митревски, повторно ќе ги брани боите на битолскиот клуб. Митревски се враќа во својот матичен клуб и ќе го поведе Еурофарм Пелистер во следните две сезони.
Во екипата доаѓа уште еден искусен ракометар, постојан учесник во Лигата на шампионите. По четири сезони во првакот на Португалија, Порто, Митревски ќе застане на голот на Еурофарм Пелистер.
Во својата кариера го носеше дресот на Констанца, Бенфика, Металург и Вардар. Официјалното претставување на Митревски е предвидено во текот на денот.
За РК Пелистер претходно настапуваше во периодот од 2005 до 2007 година. Со РК Вардар еднаш беше првак на Македонија во 2008/09, и има една куп титула, а потоа уште три пати беше македонски првак со РК Металург во сезоните 2010/11, 2011/12 и 2013/14, а и два пати дојде до пехарот во националниот куп.
Со Бенфика ги освои португалскиот Куп и Суперкуп, исти успеси имаше и со Констанца во Романија. А со Порто три пати беше шампион на Португалија, и по еднаш ги освои тамошниот Куп и Суперкуп.