Пламените јазици се стасани на околу 300 метри до селото Робово, јавуваат за Слободен Печат учесници во гаснењето на пожарот кој веќе четврти ден беснее во околината на Пехчево.

„Гаснеме заедно со австриските екипи, шумската полиција од Пехчево и АРМ“, вели Марјан Митриновски, планинар од Пехчево, во телефонски разговор од локација блиску до Робово.

Неговите драматични повици за помош, како и ужасните слики од распламтената борова шума во пехчевскиот крај се споделува на социјалните мрежи. Митриновски на својот Фејсбук профил вчера напиша: „Луѓе! Пожарот во близина на Пехчево се шири на сите страни. Помош!!!“, проследено со неколку фотографии и видео-снимки на кои се гледа како гори густа борова шума.

Митриновски вели дека засега се доволно луѓе на терен и дека пожарот се гаси со механизацијата на австриските пожарникари, но дека уморот се чувствува.

„Веќе четврти ден сум на терен, некако се издржува“, вели тој.

Негова проценка е дека самиот град Пехчево е надвор од опасност, но дека селото Робово се уште е загрозено од пожарот кој со денови беснее во тој крај.

„Ние го држиме фронтот кај селото и тука огнот е локализиран, но огнената стихија се шири и на други страни, во моментов не знам каква е состојбата таму“, вели Митриновски.