Нутриционистката Емилија Спасовска Мојсовска советува: Како да слабеете без да му наштетите на здравјето
Што е калориски дефицит, како се одржува и што се јаде пред и по тренинг?
Со доаѓањето на првото пролетно сонце, ненаситните мисли летаат во летните месеци и со тоа се фокусираат на изгледот на телото. Нема подобар мотиватор од пролетта за конечно да го почнете тој здрав начин на живот за кој фантазирате цела зима. За да ви помогнеме во креирањето на посакуваното „летно тело“, но повеќе со мислата „во здраво тело, здрав дух“, разговаравме со нутриционистката Емилија Спасовска Мојсовска која сподели со нас неколку корисни совети.
Кој е вашиот совет за полесно одржување на калориски дефицит?
– Калориски дефицит е процес на поголема потрошувачка на калории во однос на внесот, што резултира со намалување на килограмите. Калоријата е енергијата што нашето тело ја користи за сите физички активности и основните метаболички процеси во нашето тело. За калориски дефицит важен е соодносот помеѓу исхраната и потрошеното со секојдневните активности. Според тоа потребно е да се направи баланс и соодносот помеѓу активностите и исхраната да биде во предност за постигнување на дефицит. Потребно е, пред сѐ, да се одреди целта која сакаме да ја постигнеме, да се внимава на квалитетот на храната и при самиот процес да не се загрози здравјето и да не се постигнат несакани ефекти, да се внесува здрава исхрана, овошје, зеленчук, нискокалорична термички необработена храна и растителни влакна.
Колку се важни протеините во исхраната?
– Протеините имаат специфична функција во организмот и учествуваат во сите метаболички процеси, тие имаат клучна улога во создавањето и одржувањето на секоја клетка во нашиот организам. Протеините се изградени од аминокиселини, некои од нив се есенцијални за организмот, поради нивната специфична функција. Единствен извор на есенецијалните аминокиселини е исхраната. Главен извор на протеини во исхраната се производите од животинско потекло, рибата, легуминозите и житарките, зеленчук и овошје. Дневниот внес на протеини игра важна улога во одржувањето на клетки во добра форма поради што од голема важност е да се консумираат секој ден во идеални колични.
Дали јаглехидратите имаат неправилно лоша репутација?
– Јаглехидратите се примарен извор на енергија во вашето тело. Поделбата на јаглехидратите е на прости и сложени. Јаглехидратите се разложуваат на шеќер, наречен гликоза, кој преку крвотокот се транспортира до клетките, ткивата и органите. Покрај постојаното снабдување со гликоза, јаглехидратите складираат гликоза во форма наречен гликоген кои обезбедувват енергија. Верувањата и тврдењата за јаглехидратите се поделени и различни, но како и останатите микронутириенти и јаглехидратите се подеднакво важни во исхраната.
Зеленчукот, овошјето, интегралните житарки и гравот, мешунките, легуминозните култури се здрави, природни извори на јаглехидрати. Оваа храна ги обезбедува не само јаглехидратите што му се потребни на телото, туку и изобилство од витамини, минерали, растителни влакна и фитонутриенти, многу од нив делуваат антиоксидативно и го штитат здравјето на клетките.
Што да се јаде пред и после тренинг?
– Важноста на оброците пред и после физичка активност е еднаква. Во исхраната важно е правилно да се одберат намирниците и времето на консумирање во период пред и по физичка активност поради одбегнување на несакани ефекти. Оброкот пред физичка активност е важен поради тоа што го подготвува телото за напорите на кои ќе биде изложено за време на тренингот. Исто така, за успешно обновување на мускулите, стимулирање на нивниот раст и намалување на масните наслаги, враќање на енергијата и обезбедување на добро чувство.
Консумирањето на јаглехидратите пред физичка активност му овозможуваат на телото да го користи гликогенот кој е неопходен за кратки тренинзи со висок интензитет, додека мастите повеќе се препорачуваат за подолги тренинзи со умерен интензитет. Консумирањето на протеини пред физичка активност придонесуваат за раст на мускулите, полесно закрепнување на мускулите, зголемена сила и енергија за време на тренингот. Оброкот по тренингот влијае на развој на мускулите и нивно опоравување по тренингот. Препорачливо е оброкот да биде избалансиран со доминација на сложени јаглехидрати, протеини и растителни влакна коишто овозможуваат обнова или регенерација на мускулните влакна по тренингот. Покрај основните макронутриенти во исхраната пред вежбањето важно е и хидрирањето на огранизмот кое треба да биде умерено.
Како се одржува војничка дисциплина?
– Начинот на исхрана и исхраната се важни постојано без разлика на возраста и на тоа дали сакаме да намалиме, зголемиме или да одржуваме идеална телесна тежна. Дисциплината во исхраната е важна во одржување на доброто здравје, доволно енергија во текот на денот и превенирање од појави на состојби на организмот поврзани со нередовна, неизбалансирана исхрана. Со самата одлука за промена на начинот на исхрана и воведување на здрави навики во однос на исхраната го правиме првиот чекор во одржување на дисциплина која ќе ја одржиме во зависност од мотивот и целта, поради тоа важно е и да се постави посакуваната цел и очекувањата и реалноста за исполнување на целта. Еден од чекорите кој, исто така, е доста важен е подготовка на план на исхрана, по подготовка на планот на исхрана потребно е да се набават само намирниците кои ни се во планот, со однапред планирани оброци и меѓуоброци, определување на време на оброци и соодветна подготовка.