Не носат маски, се гушкаат, излегуваат во полициски час: Дали за политичарите важат истите правила? (ФОТО)
Во неколку земји е забележано како политичарите не ги почитуваат рестриктивните мерки воведени заради спречување на ширењето на коронавирусот.
Случајот на Доминик Камингс, главниот советник на британскиот премиер Борис Џонсон, кој за време на забраната на движењето заради коронавирусот со фамилијата отпатувал од Лондон во северна Англија, предизвика бурни реакции во британската јавност, а слични примери се забележани и во уште неколку европски земји.
Тоа, како што наведува во анализата Еуроњуз, го наметнало прашањето: Дали за владеачката елита важат едни правила, а за обичниот свет други?
Покрај гневните граѓани и преставници на опозицијата, оставка од Камингс бараа и четириесет пратеници на Конзервативната партија на Џонсон, која овие денови бележи рекорден пад на популарноста.
Пред да кулминира овој скандал во Британија, во Република Ирска се појавија фотографии од премиерот Лео Варадкар на кои се гледа како тој за време на рестриктивните мерки со партнерот и пријателите ужива на пикник во еден парк, по што беше критикуван дека со тоа потенцијално дава лош пример за граѓаните.
Австрискиот претседател со сопругата отишол во ресторан
Австрискиот претседател Ван дер Белен бил принуден јавно да се извини заради тоа што после заминувањето во еден ресторан тој и неговата сопруга го прекршиле полицискиот час, а и премиерот Себастијан Курц морал да упати извинување заради тоа што не носел заштитна маска додека за време на посета на едно село во близина на границата со Германија се наоѓал во група на луѓе.
Лидерот на партија во Германија се гушкал со пријатели
Во Германија лидерот на либералната партија ФДП, Кристијан Линднер е виден како во ресторан се гушка со пријатели, очигледно игнорирајќи ја опасноста од зараза, по што јавно ја признал грешката.
Полскиот премиер не носи заштитна маска
Во Полска на свеченост во знак на сеќавање на жртвите од авионската несреќа кај Смоленск, каде во 2010 година настрада и тогашниот претседател Лех Качински, премиерот Матеуш Моравјецки не носел маска, што во јавноста било карактеризирано како кршење на едно од правилата воведени заради пандемијата.
Ниту претседателот на САД не планира да носи маска
Иако во САД има најголем број на регистрирани случаи со ковид-19, а исто така и најмногу смртни случаи, американскиот претседател Доналд Трамп упорно одбива да стави маска. Тој посвети неколку објави на твитер на оваа тема, а за американските медиуми во април изјави дека „не може да се замисли себеси“ со маска, како седи во Овалната канцеларија и ги поздравува светските лидери.
Иако неговата сопруга Меланија Трамп на твитер го пишува спротивното, однсоно апелира да се носат маски, пред два дена и таа е забележана како не носи маска додека присуствува на презентација за вселенската капсула „Кру драгон” (Crew Dragon) и ракетата „Фалкон 9″ (Falcon 9) за мисијата на СпејсИкс, чие лансирање беше одложено поради силниот ветер.
Премиерот на Холандија
Иако меѓу носителите на јавни функции списокот на прекршоци на рестриктивни мерки е се поголем, спротивен пример секако претставува холандскиот премиер Марк Руте, кој придржувајќи се на правилата за забрана на посета на домовите за нега на стари лица, не заминал да ја види својата мајка која била на смртна постела, наведува Еуроњуз.