Засега не е забележан случај со труење со храна предизвикан од високите надворешни температури, но надлежните институции веќе ги испратија првите превентивни препораки за чување на храната и за заштита на граѓаните. Иако секоја година се упатуваат вакви совети, македонските потрошувачи не се откажуваат од купување на лесно расиплива храна на отворено (читај по пазарите), каде без претерување не е почитуваат хигиено-здравствените стандарди.

– Да не се купува и консумира храна со оштетена амбалажа (нагмечена, надуена или напукната), разладените или замрзнатите производи да се купуваат на крајот од пазарењето, а лесно расипливата храна какви што се месото, млекото, јајцата и други производи, по пазарењето да не се чуваат долго време во автомобилите и во други транспортни средства. Да не се купува разладена или замрзната лесно расиплива храна која се чува надвор од ладилник или замрзнувач – апелираа од Агенцијата за храна и ветеринарство.

Експертите, како и секогаш  ги предупредуваат и производителите и трговците да обезбедат услови за транспорт и чување на прехранбените производи. Од АХВ ги потсетуваат граѓаните да купуваат храна од проверени места, каде што производите, особено лесно расипливите од животинско потекло, се чуваат во разладни уреди.

– Во фрижидерите храната да се чува на температура пониска од 5 степени Целзиусови, а ако се јаде во угостителски објекти, да се води сметка тоа да се оператори со храна што водат сметка за хигиената и безбедноста и да имаат добра репутација. Во објектите за брза храна да се одбегнува да се користат додатоци што не стојат во ладилник какви што се мајонез, кечап, крем-салати, сосови, преливи и слично – додаваат од АХВ.

Како едни од најповиканите, производителите на млеко и млечни производи велат дека обезбедувањето висок квалитет започнува уште од преземањето на суровото млеко од фармите, преку дистрибуцијата, па сè до нивното правилно складирање и чување во директните продажни места.

– Ова е особено важно за кисело-млечните производи какви што се јогуртот, киселото млеко, павлаката и други производи од овој тип, кои се температурно чувствителни и за кои е задолжително, во целиот процес на производството, дистрибуцијата, продажбата, па сè до крајното сместување во фрижидер во домаќинствата, да бидат чувани во специфични услови. Токму овој процес се нарекува ладен синџир, а контролирана оптимална температура на целиот синџир е од 2 до 8 степени – објаснува Ѓорѓи Петрушев, претседател на Групацијата за производство, откуп и преработка на млеко при Стопанската комора на Македонија.

Организацијата за заштита на потрошувачите, постојано води кампањи за информирање на потрошувачите за нивната улога во процесот – од купување во маркетите до складирање во домашни услови.

– Има ситуации во кои правилата за соодветно чување на производите во маркетите или на други продажни места не се почитуваат, некогаш од дистрибутерите, некогаш од продавачите, па и од потрошувачите – додава Петрушев.

Операторите се задолжените за безбедноста на храната

Примарната одговорност за безбедноста на храната ја сносат операторите со храна, а таа треба да биде обезбедена низ целиот синџир на производство, па сѐ до преработката и дистрибуцијата. Тие се должни да обезбедат одржување на ладниот синџир, особено за замрзнатата храна. Конечно и не помалку важно е да се осигури дека увезената храна ги исполнува најмалку истите хигиенски стандарди ги исполнува најмалку истите стандарди, како и храната која е произведена во земјава, пропишува Законот за безбедност на храната.

ССМ: Работниците мора да се заштитат од топлотниот бран

Сојузот на синдикати на Македонија бара Владата да донесе мерки за заштита на животот и здравјето на работниците и граѓаните затоа што, како што велат, според најавата на Управата за хидрометеоролошки работи (УХМР) и во следните денови времето ќе биде многу топло со натпросечни температури за овој период од годината, а максималната температура ќе достигне до 40 степени.

– За да се справиме со најавените високи температури, бараме од работодавачите да ги почитуваат марките за безбедност и здравје при работа, да го намалат и да го исклучат работењето на отворено за работниците во најтоплите делови од денот, како и да ги обезбедат сите средства и мерки за заштита на животот и здравјето на работниците во овие услови. Од особено значење е да се утврдат соодветни мерки за заштита на здравјето и животот на возрасните, хронично болните и бремените работнички а доколку тоа право не се почитува ги повикуваат сите работници да пријават кај својот синдикален претставник, претставникот на работниците за БЗР и Државниот инспекторат за труд – предупредуваат од ССМ.