Надал по седум години триумфира во Акапулко
Шпанецот победи на турнирот од серијата 500 откако во финалето во два сета (6:3,6:2) го совлада Тејлор Фриц и ја продолжи трката со Новак Ѓоковиќ за првото место на АТП ранг листата.
На Рафаел Надал му беа потребни само еден час и 15 минути за да дојде до првиот трофеј сезоната и вкупно трет во мексиканскиот град.
Ова воедно е прв триумф за Надал откако организаторот одлучи да ја промени подлогата и наместо на земја, сега се игра на тврда подлога.
Во првиот сет, Американецот Фриц беше рамноправен противник само до шестиот гем (3:3), по што Надал врза три гема во низа и дојде до водство во сетови. И во вториот сет идентична слика, само што овој пат Фриц имаше 2:2 , по што Надал со два брејка и сигурен сервис дојде до 85. титула во кариерата.
Кај дамите, триумфира Британката Хедер Вотсон која со 6:3,6:7,6:1 во финалето ја совлада 17-годишната Лејла Ани Фернандез од Канада.