Двестотини милиони евра изнесува уличната пазарна вредност на дрогата која вчера беше откриена и запленета на Скопскиот аеродром, дознава „Слободен печат“ од извори во истрагата. Крајната цел на запленетиот прекурзор бил наркопазарот во земјите од Европската Унија. Оваа супстанца е чист продук од кој се прави смеса .

Станува збор за прекурзор од прва категорија во вкупно запленета количина од 1.105 килограми прашкаста материја. Според лабораториските резултати добиени од примерок од пратката, станува збор за супстанца – прекурзор „1 Phenyl – 2 Propanone” што според член 3 од Законот за прекурзори спаѓа во прва категорија согласно ратификуваните меѓународни договори и меѓународните нормативи и стандарди, истата е на листата за прекузори објавена од Министерството за здравство на која се наоѓаат сите недозволени хемиски материи што се надвор од легитимниот промет. Оваа хемиска материја позната уште и како Phenylacetone и Benzyl Methyl Ketone BMK (P2P) претставува прв прекурзор за добивање на амфетамински тип на стимуланс и се користи за илегално изработување на амфетамин, метамфетамин и МДМА – таблети екстази.

Иако првично беше објавено дека запленетата стока вреди околу 50 милиони евра, со добивањето на крајните производи како амфетамин, метамфетамин и МДМА – таблети екстази,  цената на уличниот нарко-пазар во ЕУ ќе биле фантастични 200 милиони евра. Соговорниците од истрагата велат дека ова е прв пат во земјава да се открие ваква супстанца.

Запленетиот прекурзор бил натоварен во Шангај, (Кина) и преку Истанбул пристигнал во Скопје. На царинските документи било впишано дека во пакетите има лажна хемиска сусптанца во вредност од 2.500 долари.

– Без овој прекурзот кој ја „дига“ вредноста на дрогата и нејзината јачина не може да се произведе во нарко-лабараторија за да се има краен производ – велат истражителите.

Досега во акцијата на МВР се уапсени две лица кои беа приведени на Скопскиот аеродром и се осомничени за сторено кривично дело „недозволено производство и пуштање во промет на наркотични дроги, психотропни супстанци и прекурзори” се спроведени пред судија на претходна постапка при Основниот кривичен суд Скопје. По произнесување на осомничените и Јавниот обвинител, судијата донел решенија и на осомничениот Н.К. му определил мерка притвор во траење од 30 дена, а на осомничениот М.З. му определи мерка куќен притвор во траење од 30 дена.

Како што соопштија од Основен кривичен суд Скопје, решенијата и кај двете лица се донесени заради постоење на основите од чл. 165 ст.1 точка 1,2 и 3 односно опасност од бегство, можност да ја попречи истрагата и да влијае на сведоци и можност да го повтори делото.