Мустафа Карадај ќе биде кандидат за претседател на Бугарија на Движењето за права и слободи
Движењето за права и слободи го предлага својот лидер Мустафа Карадај за претседателски кандидат на Бугарија. Негов потпретседател ќе биде бугарската европратеничка Искра Михајлова, јави дописникот на МИА од Софија.
Откако беше објавена кандидатурата на Карадај, дел од раководството на Движењето на бугарските Турци влезе во Централната изборна комисија на Бугарија за да ги регистрира своите кандидати за претседател и потпретседател.
Според еден од познатите политичари од партијата, Јунал Лутфи, ДПС дури и задоцниле со кандидатурата. Тој коментираше дека во изминатите 30 години од падот на комунизмот, ДПС се покажа како исклучително важна партија во градењето на демократска Бугарија и беше најстабилна и најпредвидлива.
Според него, многу бугарски граѓани кои не се од нивната етничка група веруваат и ја ценат улогата на ДПС, објасни Лутфи. Меѓутоа, денес, ДПС ја помина фазата да биде баланс во бугарската политика и дојде време, според него, да се игра за учество во власта. Ова е прва кандидатура на Движењето за претседател и потпретседател на Бугарија во 31-та година од формирањето.
Извор: МИА