Шпанската влада предупреди дека насилните протести во Каталонија ќе бидат пресретнати со „цврст, пропорционален и обединет“ одговор, по одредените затворски казни за девет борци за независност на регионот, кои предизвикаа насилни протести втора вечер по ред, објави британски „Гардијан“.

Во еден од најексклузивните делови на Барселона, планираните мирни демонстрации се претворија во судири со полицијата. Демонстрантите запалија огнови на повеќе локации и поставија импровизирани барикади во центарот на градот, пред групата да биде разбиена од шпанската и каталонската полиција.

Слични сцени можеа да се забележат и во Тарагона, Жирона и Леида, каде има информации дека се повредени повеќе луѓе.

Шпанската влада изјави дека 51 човек е уапсен ширум Каталонија во понеделникот и вчера, додека 54 полицајци од регионалната полиција и 18 од националната полиција се повредени.

– Очигледно е дека ова што го се случуваа не е мирно граѓанско движење, туку координирано од групи кои користат насилство за да го нарушат соживотот во Каталонија – стои во една изјава на надлежните.