Михаел Рот: Бундестагот да даде зелено светло за отворање на преговорите со Северна Македонија
Германската влада побара од Бундестагот да донесе одлука за отворање на преговори со ЕУ за Северна Македонија и Албанија.
Државниот секретар за европски прашања во Министерството за надворешни работи на Германија, Михаел Рот испратил писмо до Бундестагот во кое се наведува дека согласно заклучоците од Европскиот совет од 26 јуни 2018 година, Северна Македонија и Албанија треба да добијат датум за преговори со ЕУ во јуни 2019 година.
– Федералната влада на Германија смета дека Европската комисија ќе даде позитивна препорака за отварање на пристапните преговори со Северна Македонија и Албанија. По излегувањето на извештаите за овие две земји, германскиот Бундестаг ќе биде информиран, тврди Рот.
Германскиот министер тврди дека Северна Македонија и Албанија ги усогласиле нивните легислативи со европските и постигнале напредок и значајни резултати.
Рот препорачува да се отворат преговори со Северна Македонија и Албанија и заради опасноста од заостанување во развојот на регионот, што ќе донесе нестабилност и вклучување на другите влијателни земји како Русија, Кина и Турција со свои интереси.