Пред почетокот на Австралија Опен , Новак Ѓоковиќ се најде на удар на медиумите кои го критикуваа неговиот обид да им помогне на тенисерите кои се наоѓаат во строг карантин и бараше олеснување на мерките. За време на Австралија Опен, Ѓоковиќ постојано беше мета на критики кои се зголемија откако во третото коло на дуелот против Тејлор Фриц побара медицинска помош, поради што многумина се сомневаа дека ја лажира повредата. Но, на крајот Новак Ѓоковиќ си замина со деветтиот грен слем трофеј од Австралија Опен.
– Тоа беше голема победа за Новак, покажа дека и понатаму е на врвот. Неверојатно достигнување е да се освои еден турнир толку пати и тој податок веќе требаше да ги замолчи неговите критичари – изјави Енди Мареј.

Британецот исто така зборуваше и за тоа што ги издвојува Новак Ѓоковиќ, Рафаел Надал и Рожер Федерер од останатите тенисери на АТП.
– Кај врвните тенисери секогаш станува збор за неверојатниот талент, менталната сила, фокусот, посветеноста и напорната работа. Тие околу себе имаат одлични тимови и тоа многу им помага. Исто така, тенисот е игра во која искуството има голем удел – смета Мареј.