Македонија со капитенот Војдан Стојановски ќе брка победа над Естонија
Макар што еден од најискусните македонски кошаркарски репрезентативци Војдан Стојановски „влече“ една нималку наивна повреда на задната ложа, нема откажување.
Војдан Стојановски беше дел од последните тренинзи на нашиот национален тим. И веќе „вообичаено“ кога станува збор за предводникот на сениорите, ќе му се стави на располагање на стручниот штаб.
Повредата на задната ложа на левата нога ја доби на финалниот натпревар од Купот на Македонија завршен овој викенд во Битола.
Очекувано, Стојановски доби одредена поштеда од селекторот Александар Јончевски на овие мини-подготовки пред мечот со Естонија на стартот од квалификациите за Евробаскет 2025.
Сè со цел капитенот да биде во стројот, да „го одигра своето“, и да им помогне на соиграчите во обидите да се излезе како победник против сериозно незгодниот ривал од Балтикот.