Лимани: Ахмети заедно со Ковачевски да одговорат дали се за ЕУ и САД или за Србија и Русија
Лидерот на ДУИ и Владата им должат на граѓаните одговор дали се со САД и ЕУ или за Србија и Русија, истакна на денешната прес конференција потпретседателот на БЕСА Фатмир Лимани, поранешен функционер на ДУИ, како и внук на Али Ахмети.
Како што посочи, секој ден владата на СДСМ и ДУИ поради организираниот криминал и братските односи со Русија и Србија ги уништуваат односите до степен на непријателство со стратешките партнери САД и ЕУ.
„За тесни, групни, лични и партиски интереси лидерот на ДУИ заедно со неговиот полубрат Ковачевски, преку антинационалистички проекти од типот на „Отворен Балкан“ ја насочуваат земјата кон српско-руските интереси и отстапуваат од европските вредности и стратешките политики на САД за балканот и нашата земја. Ги повикуваме САД и ЕУ да бидат поостри во однос на досегашните наредби упатени кон сегашната власт да се откажат од корупцијата која ја вметнаа во секоја пора на институциите. Според статистиките и анкетите нашата земја е преставена како корумпирана од 95 до 97 % во сите слоеви“, вели потпретседателот на БЕСА Фатмир Лимани.
Тој обвини дека актуелната власт подготвува терен за враќање на Груевски во земјата и негово прогласување за невин.
„За ситуацијата да биде пострашна, криминалната влада наместо да ги спроведува реформите, таа подготвува терен за враќање на Груевски и негово прогласување како невин за тешки казни и злоупотреби кои ги направи со ДУИ. Ставот на САД и сите европски земји е јасен, нападите на српските терористи ги прогласија за терористички, додека Ахмети преку министерот Османи испрати умерена и пријателска порака дека треба да се чека и да се види дали Србија е вмешана во овие напади. Граѓаните се заситени со игрите на актуелната власт и сватија дека криминалната власт терминот европски фронт го користи само формално за да ја зачува позицијата“, рече Лимани.