Ковид-19 под Исар: Директорка на штипска градинка и второоделенец во изолација
Едно дете од основното училиште „Славејко Арсов” во штипската населба Баби од утринава е во изолација по позитивен тест на ковид-19 на еден од неговите родители.
– Момчето е од второ одделение, но тоа не е позитивно, туку неговиот родител. Превентивно ќе биде во изолација до добивање на негативен тест на родителот, вели Билјана Казанџиска, раководител на Секторот за образование, ЛЕР и јавни дејности во Општина Штип.
Таа потенцира дека учениците од неговото одделение, но и од останатите немале физички контакт со детето кое е во изолација. Детето ќе следи настава онлјан, од својот дом.
Директорката на градинката „Вера Циривири Трена” во Штип, Софка Атанасова од денеска е во изолација, бидејќи имала контакт со лице кое е позитивно на коронавирусот.
Раководителот на Секторот за јавни дејности, ЛЕР и образование во Општина Штип, Билјана Казанџиска ја потврди информацијата и вели дека директорката нема никакви симптоми, но во согласност со протоколите и во насока на заштита на персоналот, самата директорка побарала да биде во изолација.