Оние лица кои во Франција ги кршат мерките за изолација заради коронавирусот, наместо да плаќаат казни и да одат во затвор, треба да бидат испратени на „општествено корисна работа“ во болниците кога ќе заврши епидемијата, побара државниот обвинител во Париз, Реми Ејц.

Ејц, кој воедно е и национален јавен обвинител за борба против тероризмот, оцени дека ваквите „казни“ би биле многу поучни и корисни, особено за младите кои ја прекршуваат мерката за изолација, а парични казни од 3750 евра или затворски казни до шест месеци да се изрекуваат во случај да се повтори прекршокот.

Овој висок владин функционер за радио „Франс енфо“ изјави дека е задоволен во исто време што огромното мнозинство граѓани ја почитуваат „социјалната дистанца“ и ограничувањата на движењето заради епидемијата на коронавирусот.

Но, тој исто така укажа на фактот дека за време на двонеделната широка забрана за движење и изолација, француската полиција извршила проверки на над 300.000 луѓе и изрекла 25.000 казни.

Обвинителот за областа во Париз овој факт го оцени како добар, бидејќи од 10 проверки е утврдено дека само едно лице не ја почитувало забрнаата за движње.

Реми Ејц, исто така, рече дека полицијата открила и спречила петнаесет случаи на продажба на црно на заштитни маски.