Клоп наскоро ќе си замине од Ливерпул?!
Екипата на Ливерпул е на прагот конечно да ја освои титулата во Премиер лигата која неговите навивачи ја чекаат дури 30 години. На „црвените“ им се потребни само шест бода за да ја обезбедат титулата, а успехот највеќе му се припишува на Јирген Клоп кој го прероди тимот.
Ливерпул е актуелен европски шампион, но навивачите стравуваат дека одличниот германски тренер наскоро може да си замине, а поранешниот фудбалер на Ливерпул и на англиската репрезентација, Стив Мекманаман верува дека тоа е прашање на време.
– Мислам дека Јирген ги обожува Ливерпул и Премиер лигата, но можам да го замислам како се враќа во Германија и го презема кормилото на Баерн. Начинот на кој се води тој клуб и начинот на кој германските тренери гледаат на него, нешто ми зборува дека неговото заминување во Минхен е реално. Изгледаше дека Баерн е во пад, но сега повторно има одличен тим кој е спој на искусни и млади и талентирани фудбалери – изјави Мекманаман кој верува дека Германецот не би седнал на клупата на шпанските гиганти и единствена опција за него е само враќање во Германија.
– Убеден сум дека не го интересираат Реал Мадрид или Барселона, посебно откако Кристијано Роналдо си замина од „Сантијаго Бернабеу“.