Казна затвор од една година за ширење говор на омраза врз основа на сексуална ориентација
Основниот суд во Неготино по обвинителен предлог на Основното јавно обвинителство Кавадарци, а по кривична пријава од Квир Центар, донесе пресуда против лицето С.М. за ширење говор на омраза на социјални мрежи.
Од Скопскиот Квир Центар ја поздравија одлуката на судот и порачаа дека оваа осудителна пресуда е значајна победа во напорите да се креира безбедно опкружување за сите граѓани. Ова, како што велат, е прва осудителна пресуда во судската пракса на Македонија со која се санкционира говор на омраза врз основа на сексуална ориентација.
– Обвинетиот, во јули минатата година, на социјалната мрежа Фејсбук под споделена медиумска содржина има напишано два коментари со вознемирувачки говор на омраза кон ЛГБТИ+ заедницата, во кои се повикува на насилство кон оваа маргинализирана група. Со тоа обвинетиот сторил кривично дело „ширење на расистички и ксенофобичен материјал по пат на компјутерски систем“ од чл. 394-г ст. 1 од Кривичниот законик, па судот му изрече алтернативна мерка – условна осуда, казна затвор во траење од една година. Утврдената казна затвор нема да се изврши доколку обвинетиот во рок од една година по правосилноста на пресудата не стори друго кривично дело – објавија од Квир Центар.
Според чл. 394-г ст. 1 од КЗ, за ширење на расистички и ксенофобичен материјал по пат на компјутерски систем, предвидена е казна со затвор од една до пет години за секој што ќе предизвика или ќе разгори омраза, раздор или нетрпеливост, врз некоја дискриминаторска основа, вклучително врз основа на припадност на маргинализирана група.