Картата на Орбан во Фидес повторно ја испровоцира хрватската јавност (ФОТО)
Унгарскиот премиер Виктор Орбан одржа состанок на претседателството на својата деснo -популистичка партија Фидес. Според хрватски „Индекс“, тоа само по себе и не е некоја вест, доколку состанокот не се случеше пред голема врамена карта на „историска Унгарија“, која опфаќа голем дел од териториите кои денес се наоѓаат во Хрватска.
„Индекс“ пишува дека картата е постојан инвентар во просториите на партијата, а Орбан објави фотографија кадешто истата може да се забележи, со описот: „Адвентски состанок на претседателството на партијата“.
16. Elnökségi ülés Advent idején // Advent meeting of the party presidency
Publiée par Orbán Viktor sur Lundi 16 décembre 2019
Дека Орбан и неговата влада се носталгични за времето кога Унгарија имала значително поголема територија, вклучувајќи и делови од повеќе земји на Балканот, не е новост и тајна, пишува хрватскиот медиум.
Така во јуни оваа година официјалната унгарска Твитер-страница на англиски јазик објави илустрација, односно стилизирана карта со која се сугерира дека по Првата светска војна и Трианонскиот договор на Унгарија ѝ се украдени две третини од територијата, вклучувајќи дури 63 илјади квадратни километри кои се дел од денешна Хрватска, Словенија и Србија.
На овој провокативен твит, кој околните земји го сфатија како иридентистичко посегање по териториите на соседните држави, беше дочекан со силна осуда во Словенија, додека Хрватска, според „Индекс“, ја премолчела провокацијата.