Карло Анчелоти ќе биде нов селектор на Бразил?!
Тренерот на Реал Мадрид, Карло Анчелоти ќе ја преземе бразилската фудбалска репрезентација во јуни следната година, пренесува „Глобо“.
Анчелоти има договор со Реал до јуни 2024 година. Италијанскиот стручњак наводно се согласил потоа да седне на клупата на „кариоките“, откако постигнал договор со претседателот на Бразилската фудбалска конфедерација (ЦБФ), Едналдо Родригес.
Анчелоти ќе биде првиот странец на функцијата селектор на јужноамериканската репрезентација. Ова воедно ќе биде прва работа за Анчелоти како селектор во кариерата.
Репрезентацијата на Бразил до јуни следната година ќе ја предводи Рамон Менезес, кој беше назначен за привремен селектор, откако Тите поднесе оставка на крајот на минатата година по елиминацијата во четвртфиналето на Светското првенство во Катар од Хрватска.
Анчелоти (64) е тренер на Реал од 2021 година, а раководеше и со мадридскиот клуб од 2013 до 2015 година. Беше тренер и на Евертон, Наполи, Баерн, ПСЖ, Челси, Милан, Јувентус, Парма и Реџана.
