Јорданов: Лично го предупредував министерот Филипче за состојбите во штипската болница и недостигот на кислород
Пратеникот на ВМРО-ДПМНЕ, Иван Јорданов, преку соопштение на опозициската партија, тврди дека лично го предупредил министерот за здравство, Венко Филипче за состојбите во штипската болница и недостатокот на кислород што е неопходен на пациентите заразени од ковид-19.
– Филипче, заедно со директорот, ги игнорираа овие апели од мене и од јавноста и тоа за жал чинеше човечки живот. Знаеја дека има недостаток на кислород, не постапија и продолжија со мантрата дека сè е под контрола. Контролата e одамна изгубена. Загубен е човечки живот, прстот е вперен кон Филипче и затоа оставка веднаш. Време е заедно со директот на болницата во Штип да преземат одговорност за злочинот што го прават на граѓаните од Источна Македонија, се вели во дописот на ВМРО-ДПМНЕ во кој се истакнува реакцијата на Јорданов.
Власта, се додава во соопштението на опозицијата, останала глува на нејзините предупредувања за состојбите, за поставувањето на ветениот монтажен ковид-центар и конечно за завршување на новата Клиничка болница во Штип што четврта година е во застој.
– Фејсбук сведоштвото на младата девојка која ја загуби мајка си, поради нефункционирање на системот и слабата организациска поставеност, даде причина повеќе овие двајца да ги напуштат функциите. Овој двоец на менаџерски тим, четврта година ги оставаат граѓаните од Истокот без нова Клиничка болница и цела година без ветениот монтажен ковид-центар што, пак, придонесе за граѓаните да бараат спас за својот живот во скапото приватно здравство. Неодговорниот пристап на раководните структури и слабата организациска поставеност, секојдневно придонесуваат да броиме мртви меѓу роднините и пријателите, додека ковид профитерите заработуваат на грбот на сиромашниот народ, обвинуваат од опозициската партија.
Од ВМРО-ДПМНЕ бараат и јавното обвинителство да го истражи третманот на пациентите во болницата во Штип.