Рафаел Надал е надвор од терените речиси цела 2023 година, но тренерот на Новак Ѓоковиќ верува дека Шпанецот сепак ќе биде опасен во неговиот планиран кам-бек следната година.

Имено, Надал неодамна објави вест за неговото планирано враќање на турнирите откако беше подложен на артроскопска операција во јули.

– Тоа е најдобрата вест за светскиот тенис во моментов, ако се врати. Сепак треба да чекаме Надал да го потврди тоа. Само тогаш можеме да бидеме сигурни за враќање и барем уште една година, продолжување на големото ривалство со Новак – вели Иванишевиќ.

Надал доби повреда која го оддалечи од терените од јануари. Поради тоа 22-кратниот грен-слем шампион падна надвор од најдобрите 200 во светот и беше принуден да го пропушти Ролан Гарос првпат од 2004 година.

Во меѓувреме Новак Ѓоковиќ ги освои Австралија опен, Ролан Гарос и САД Опен оваа година.

– Убеден сум дека Надал ќе биде опасен на Ролан Гарос. Всушност, тој ќе биде најопасен затоа што никој не бил толку доминантен како него на Ролан Гарос, а можно е во годината на Олимписките игри да се стреми кон двојната круна во Париз – смета Хрватот.