Вчера поголем број медиуми објавија дека Антонио Конте ги договорил личните услови со Тотенхем, дека Италијанецот би бил идеален тренер на премиерлигашот кој два месеци бара долгорочно решение на клупата по отказот на Жозе Мурињо.
Конте си замина од Интер откако ја освои шампионската титула во Серија А, но се поизвесно е дека нема да биде тренер на Тотенхем.
Според Би-Би-Си, Конте не му верува на претседателот на Тотенхем, Даниел Леви, односно се сомнева дека ќе му обезбеди буџет за засилувања по вкус на Италијанецот. Италијанецот исто така се сомнева дека Леви ќе успее да ја задржи првата ѕвезда на екипата, Хари Кејн кој сака да си оди бидејќи со Тотенхем не може да освојува трофеи.
Во исто време,и кај Тотенхем се појави сомнеж бидејќи Антонио Конте има репутација на тренер кој бара „готови ѕвезди“ додека политиката на клубот е да се развиваат млади фудбалери.