Македонската женска одбојкарска репрезентација денеска во својот последен петти натпревар од групната фаза загуби и од Полска со 3:0 во сетови 25:8, 25:8 и 25:18.

Со пет порази во групата „1“ нашата селекција го заврши на Европското првенство за одбојкарки до 19 години кое се одржува во Скопје.

Полските одбојкарки исто така беа пресилни, а „црвено-жолтите“ рамноправно се бореа само во третиот сет кој го загубија со 25:18.

Најефикасна во нашите редови беше Добрина Хаџи Тосева со 11 поени, по три имаа Ана Јаничиќ и Марија Пакетова, а по два Мила Долдурова, Анастасија Овнарска и Ива Стојкоска.

Македонија со ист резултат 3:0 во нашата група ги загуби и претходните натпревари со Италија, Словенија, Финска и Грузија.

Полуфиналните двојки на ЕП се Србија – Полска и Италија – Холандија, а битката за медалите ќе се води во СЦ „Борис Трајковски“ – Скопје во претстојниот викенд. Во СЦ „Јане Сандански“ ќе се играат мечевите за пласман од петтото до осмото место во конечниот пласман на шампионатот, Словенија против Хрватска, а Турција е ривал на Финска.