Ѓоковиќ пропушти три меч топки, Италија израмни на 1:1 против Србија
Завршија мечевите во сингл конкуренцијата од полуфиналниот дуел во Дејвис куп натпреварувањето меѓу тениските репрезентации на Италија и Србија каде резултатот моментно е 1:1.
Во првиот меч Миомир Кецмановиќ донесе предност за Србите по победата над Лоренцо Мусети со 2:1 во сетови 6:7 (7), 6:2 и 6:1.
Следуваше втората пресметка меѓу Новак Ѓоковиќ и Јаник Синер во кој првиот светски рекет пропушти убава можност да донесе финале за својот национален тим.
Ѓоковиќ во третиот решавачки имаше водство од 5:4 во гемови и 40:0, но изненадувачки од вкупно три не успеа да искористи ниту една меч топка. Синер се извлече од опасноста, направи целосен пресврт и на крајот триумфираше со 2:1 (6:2, 2:6, 7:5).
Победникот ќе го одлучи мечот во двојки, а таму Италија ќе настапи со Синер и Лоренцо Сонего, а за Србија ќе играат Ѓоковиќ и Кецмановиќ.
Потсетување дека победникот од овој меч, во големото финале ќе игра против селекцијата на Австралија која во петокот ја елиминираше Финска.