ФФМ е против Суперлигата: Славата не е само цел, туку патување кое се заработува со труд и пот на теренот
Денеска главна тема во фудбалскиот свет е одлуката на Европскиот суд на правдата во корист на т.н. „Суперлига“ за нејзино формирање, но од УЕФА и ФИФА не се загрижени.
Првиот човек на светскиот фудбал, Џани Инфантино изјави дека ваквата одлука на судот нема да промени ништо кога е во прашање развојот на фудбалот.
И оние богати клубови кои беа дел од иницијаторите на овој проект, веднаш реагираа нагласувајќи дека се против вакво натпреварување и дека застануваат на страната на УЕФА.
Реал Мадрид и Барселона остануваат верни на идејата, а во меѓувреме се шпекулира дека и актуелниот италијански шампион Наполи на Елиф Елмас изразува желба да игра во Суперлигата.
Се огласи и Фудбалската федерација на Македонија (ФФМ) која исто така е против Суперлигата и ја поддржува УЕФА:
– Фудбалската федерација на Македонија со цело срце ја поддржува УЕФА. Славата не е само цел, туку патување кое се заработува со труд и пот на теренот. Со секој потег или додавање, со секоја надеж, ние бараме чесност и страст во играта. Секој тим нека биде инспириран да игра со целото срце, да се бори за секоја топка како да е последна и да се натпреварува во духот на вистински фер плеј. За љубовта кон играта што нè обединува и нè мотивира сите заедно – се вели во објавата на ФФМ.
Манчестер јунајтед, Атлетико и Баерн се против формирање на Суперлигата