Денеска во дербито на македонската ракометна Суперлига во салата „Боро Чурлевски“ во Битола актуелниот шампион Еурофарм Пелистер триумфираше против големиот ривал Вардар 1961 со 29:25.

Иако на крајот победија играчите на Александар Јовиќ, повеќе се радуваат ракометарите на Владо Недановски бидејќи ќе останат на врвот во групата „Б“.

Вардар и Пелистер имаат по 21 бод, но скопските „црвено-црни“ остануваат како првопласирани поради победата од пет голови разлика во првиот меѓусебен меч сезонава (30:25). Доколку остане ваква ситуацијата до крајот на прелиминарната фаза во првенството, тогаш Вардар ќе пренесе три бода во плеј-офот.

Еурофарм Пелистер до крај го контролираше резултатот во своја корист, на стартот од натпреварот стекна водство од 7:1, па имаше 9:3, а дојде и до „плус седум“ (14:7). На паузата домаќинот водеше со 18:11, а на стартот од второто полувреме достигна и највисоки 23:14.

Не се предаваа гостите, постепено ја намалуваа негативата во вториот дел, дојде до 23:16. И на 10 минути до крајот на средбата битолската екипа водеше со девет голови разлика, но повторно Вардар се враќаше во игра, и дојде на само „минус пет“ (29:24) по голот на Јагуриновски. А по клучната одбрана на Томовски, во контранапад во последните секунди гол постигна Ѓукиќ.

Кај стрелците, во редовите на Еурофарм Пелистер по пет голови имаа Тајник и Костески, а на спротивната страна за Вардар по четири погодоци запишаа Срдановиќ, Родригез и Лазаревски.

Во неделата се одигра уште еден меч, Голден Арт како домаќин со 30:21 го совлада Мулти Есенс. Табела: Вардар 1961 21 бод, Еурофарм Пелистер 21, Бутел скопје 15, Тинекс Пролет 12, Голден Арт 10, Прилеп 7, Мулти Есенс 6, Вардар Неготино 3.